صينية قرنبيط بالبشاميل

النهارده أنا جايبة لكم وصفة جميلة أوي يا رب تعجبكم..
تعالوا نشوف مع بعض طريقة القرنبيط باللحمة المفرومة والبشاميل..


المقادير
ثمرة قرنبيط كاملة
نص كيلو لحمة مفرومة
ملح وبهارات وفلفل أسود
2 بصلة متوسّطة الحجم
زيت أو سمن حسب الطلب
بيضة


مقادير البشاميل
نصف كوب زيت صغيّر
5 ملاعق دقيق كبيرة
نصف كيلو لبن


الطريقة
1- نقطّع القرنبيط ونفككه من بعضه، ونغسله وبعد كده نسلقه.

2- نحضر عصاج اللحمة المفرومة عن طريق إننا نفرم البصلتين ونشوّحهم في زيت أو سمن لغاية ما لونها يبقى ذهبي، ونضع اللحمة المفرومة والتوابل وكوب ماء صغير ونسيبها لغاية ما اللحمة تشرب ميتها وتتعصج.
3- نبتدي بقى نعمل البشاميل:
- نضع الزيت وعليه الدقيق، ونقلّبهم شوية.
- بعد كده نحط اللبن مع التقليب المستمر علشان الدقيق ما يكلكعش منك في اللبن، وتستمري في التقليب لغاية ما تحسي إنها تقلت معاكِ، ولو حبيتي تخفيفها لو تقلت منك أوي ممكن تحطي شوية شوربة.

4- نجيب صينية متوسّطة الحجم ونضع فيها شوية زيت، ونضع نصف القرنبيط بعد ما نقطعه قطع صغيرة، وبعدين نحط عليهم شوية بشاميل ونقلبهم كويس ونفردهم تاني في الصينية.

5- نضع عصاج اللحمة فوقيهم، وبعدين نرص باقي قطع القرنبيط.

6- نغطي سطح الصينية بباقي البشاميل كله.

7- نضرب البيضة كويس، ونحط عليها فلفل أسود، وبعدين نحطها على الوش علشان يحمر.
8- توضع الصينية في فرن متوسط الحرارة، ونتابعها لغاية ما نتأكد من إن الوش أحمر.وممكن اضافة نوع من الجبن مثل المودزريلا فى البشاميل للى يحب.
وبالهنا والشفا عليكم.. وأتمنى إنها تعجبكم، أنا عارفة إني طوّلت عليكم والوصفة كبيرة.. بس بجد جامدة وجميلة أوي أتمنى إنكم تجرّبوها،[center]

تسلم الايادى يا داليا

اشكر مرورك الجميل شيرى واتمنى ان انفعكم بمشاركاتى واتمنى لقائك قريبا

شكرا مرورك يا هدى واضافتك الجميلة.......بس مش عارفة ليه الناس بتشوف الموضوع ومش بتعلق ولا يعنى الموضوع ما يستاهلش قوى كده او يمكن ماعجبتهمش الوصفة بس برده ممكن يقولو ده احنا بقينا فى عصر الحرية ولا ايه!!!!!

لو بس تحطيلى emotion احسن من كدة

جميل جدا ياداليا بس انا نفسى اعرف الطريق بتعتك ولا بتاعت هدى

الحقيقة الطريقة الاصلية من داليا

ولها جزيل الشكر